《人生紅綠燈》
7日留港奇遇，排名不分先後：
1. 突然收到通知要48小時內返鄉下一轉。
2. 明明買咗econ機票，上到機艙後突然俾FA走埋嚟撕票！「撕爛咗我哋張機票」，然後upgrade 咗做business class!’😁
3. 出走香港後3年，一把蓬鬆的曲髮已成為我的「嘜頭」但⋯我突然⋯拉直咗佢🤦🏿♀。
4. 返咗香港先知，開咗就嚟50年嘅怡東酒店突然執鬼咗。
5. 唔鍾意食肉碎嘅意佬，突然愛上咗雲桂香米線😳
6. 突然發現老媽子講嘢慢～咗～好～多～，我講得太快佢亦聽唔明👵🏼
7. 香港好多餐廳突然冇哂餐牌，要焗你download個app喺電話落單😳
8. 貼紙相舖突然埋沒於香港嘅塵土，消聲匿跡😖
我突然發現做人就好似玩「一二三紅綠燈」咁，一開始時所有人一直都喺你眼前，唔郁，唔笑，第一次拎轉面數一二三後，回頭再望時，跑嘅跑，郁嘅郁……第二次數一二三，再望返轉頭，發現有啲人突然掂到捧牆，有啲直頭突然走鬼埋。你就知道，你輸了。
時間真係可打敗好多東西，當事情放喺你眼前，你睇得好清楚透徹。
你以為你唔郁，對方周邊事物亦沒有改變，那就非常好。
可惜你忘記了，暫時仍未有一部冷凍時光機，將所有東西凍結一萬年，。結果你曾認為還有時間可試呢間酒店嘅自助餐，還有機會影貼紙相，還有機會再約朋友見面，還有時間可向你一直想向佢講聲對唔住既人道歉，還有時機會去做些什麼去彌補過失，結果都突然消失哂。
突然，你發現想做的事情，想見的人，就好似同你玩緊一二三紅綠燈咁，趁你一個唔留神，悄悄的離開了。縱使你想伸出雙手挽留，可能只有換來一句「太遲了」。
好好的活著，珍惜現在擁有的一切，唔好再同自己講「仲有機會嘅」，「遲啲先啦，仲有時間」去麻醉自己。時間真係唔容許你等下去！處之泰然接受人生中種種意料之外嘅事情，及時行樂。好似我同意佬咁，既然upgrade咗去business，欣然接受同埋即刻叫返杯香檳啤啤佢😆
Search